ටයිටස් තොටවත්ත මහතා.

 1929 අප්‍රේල් මස 17 වන දින බොරැල්ලේ දී උපත ලැබූ ටයිටස් තොටවත්තයන්ගේ මුල් නම දොන් එමානුවෙල් ටයිටස් ද සිල්වා විය. පස් දෙනෙකුගෙන් යුතු පවුලේ බාලයා වූ ටයිටස්ට  තොටවත්ත වැඩිමහල් සහෝදරයන් දෙදෙනකු විය.  තොටවත්ත මහතා මූලික අධ්‍යාපනය හැදෑරුවේ කොළඹ ආනන්ද විද්‍යාලයෙනි. පාසල් යන අවධියේ සිටම නව දේ පිළිබඳ දැක්වූ උනන්දුව නිසාම මරදානේ ටෙක්නිකල් කොලීජියෙන් කැමරාකරණය පිළිබඳ හදාරා ඇත .

ආනන්ද විද්‍යාලයෙන් මූලික අධ්‍යාපන ලබාගත් තොටවත්තයන් පසුව හේවුඩ් විද්‍යායතනයේ ජේ. ඩී. ඒ. පෙරේරා හා ස්ටැන්ලි අබේසිංහගෙන් චිත්‍ර කලාව හා මූර්ති කලාව ඉගෙන ගත්තේය. ශේෂා පලිහක්කාර සහ මුකේත්‍ර දත් යන ශිල්පීන් සමග නැටුම් කලාව ද හදාළ ඔහු ආනන්ද සමරකෝන්, සුනිල් ශාන්ත යන ශිල්පීන් සමග සංගීත කලාව ද හදාළා ඇත .

සිනමාවට පිවිසීමේ මූලික අඩිතාලම ලෙස මරදානේ ටෙක්නිකල් කොලීජියේ දී උගත් ඡායාරූපකරණය ටයිටස් තොටවත්තයන් හට විශාල පිටිවහලක් විය. 1952 දී රජයේ චිත්‍රපට සංස්ථාව පිහිට වූ පසු වාර්තා චිත්‍රපට නිෂ්පාදනය පිළිබඳව කටයුතු කිරීමට සම්බන්ධ විය. එහිදී ඔහු වාර්තා චිත්‍රපට නිෂ්පාදනය පිළිබඳ රැල්ෆ් කීන් යටතේ හදාරනු ලැබුවේය. කැමරාකරණය, ශබ්ද පරිපාලනය සහ රසායනාගාර කටයුතු පිළිබඳ රජයේ චිත්‍රපට අංශයේ සිටි ඉතාලි විශේෂඥයකු වන ෆෙඩ්රිකෝ සේරා සහ ජියෝජියෝ කලබ්‍රි‍යා යටතේ පුහුණුව ලබා තමා වැඩියෙන්ම ඇලුම් කළ සංස්කරණ ශිල්පය වෙත නැඹුරු විය.

මෙලෙස රජයේ චිත්‍රපට ආයතනයේ කටයුතු කරමින් සිටිය දී 1956 සැප්තැම්බර් 01 වැනි දින ලෙස්ටර් ජේම්ස් පීරිස් මහතා සහ විලී බ්ලේක් මහතා සමග එක්වී රජයේ චිත්‍රපට ආයතනයෙන් ඉල්ලා අස්විය. ඇතමුන් එකල මොවුන්ව හඳුන්වන ලද්දේ “පිස්සන් තිදෙනකු, ලෙසින් යැයි පිලිප් කුරේ තම “හුදෙකලා කලාකරු” කෘතියෙහි සඳහන් කරයි. සිංහල සිනමාවේ අමරණීය පිටුවක් පෙරලූ “රේඛාව” චිත්‍රපටය මොවුන්ගේ දායකත්වයෙන් නිර්මාණය වූවකි. එහි සංස්කරණ ශිල්පියා ලෙසද කටයුතු කළේ තොටවත්තයන්යය.

1956 න් පසු චිත්‍රපට ගණනාවකටම තොටවත්ත මහතා තම දායකත්වය ලබා දී ඇත . 1957 දී එංගලන්තයේ “ආතර් රෑන්ක්” නිෂ්පාදන සමාගමේ පයින්වුඩ් චිත්‍රාගාරයේ චිත්‍රපට නිෂ්පාදන තාක්‍ෂණය පිළිබඳ පුහුණු කටයුතුවලට ද හෙතෙම සම්බන්ධ විය. අනතුරුව බ්‍රි‍තාන්‍ය චිත්‍රපට ආයතනයේදී හා ප්‍රංශයේ සිනමැනකේ ආයතනයේ දී ජගත් සිනමාවේ ඉතිහාසය හා වර්ධනය පිළිබඳ පාඨමාලාවක් හදාරා ඇත . 1956 සිට 1980 දක්වා කාල පරිච්ඡේදය තුළ විශාල චිත්‍රපට සංඛ්‍යාවකට දායක වූ තොටවත්තයන්ගේ සිනමා ගමන් මාර්ගය 1956 රේඛාවෙන් ආරම්භ වී 1979 හඳයාගෙන් අවසන් විය. සුවිශේෂී චිත්‍රපට රැසක සංස්කරණ කටයුතු සිදුකළ තොටවත්තයන් සංස්කරණ ශිල්පයේ නව ප්‍රවණතාවන් ගොඩනංවමින් රූප රිද්මය කතාවට ගැළපෙන ආකාරයට එකතු කරමින් ශිල්පීය සම්ප්‍රදායට ගැති නොවෙමින් සිය සංස්කරණ කටයුතුවල නිරත විය. මෙසේ සිනමාවේ ඉදිරියට යෑමේ දී එංගලන්තයේ ටෙක්නිකල් රසායනාගාරයේ වර්ණ රසායන කටයුතු පිළිබඳ වත් ආතර් සී ක්ලාක් මහතාගේ ආරාධනය පරිදි මෙට්රෝ ගෝල්ඩ්වින් මේයර් චිත්‍රාගාරයේදී ස්ටැන්ලි කුබ්රික්ගේ 2000- A Space Odessy චිත්‍රපටයේ නිෂ්පාදන කටයුතු සඳහා නිරීක්‍ෂකයකු වශයෙන් මෙතුමන්  සහභාගී වී ඇත.

සිනමාවේ කාර්මික ශිල්පියකු ලෙස කාර්මිකත්වය අභිබවා, සංස්කාරක ශිල්පියෙකු ලෙස දක්‍ෂතා දැක්වූ තොටවත්තයන් 1965 දී ‘චණ්ඩියා’ චිත්‍රපටය අධ්‍යක්‍ෂණය කරමින් චිත්‍රපට අධ්‍යක්‍ෂකවරයකු බවට පත්විය. එවකට පැවැති සාම්ප්‍රදායික සිනමා කලාවට අභියෝග කරමින් සමාජ යථාර්ථයන් එළිදැක්වීමට වෙහෙසුන තොටවත්තයන් කතාව, තිර රචනය, සංස්කරණය සහ අධ්‍යක්‍ෂණය කළ චිත්‍රපට බොහෝය. ඒ අතර

 කවුද හරි (1969)

තෙවත (1970) 

      හාරලක්‍ෂය (1971) 

   සාගරිකා (1974)

සිහසුන (1974)

 මංගලා (1976) 

                  මරුවා සමග වාසේ (1977)

හඳයා(1979) 

    මුල්තැන ගත් චිත්‍රපට වෙයි.